کابل پرس

پیدا کدونی دوبارہ شمامہ

2014-12-12T21:08:37Z

تقریباً دسمبر 2011 بود کی یگ روز دیدوم کی فیس بوکی دیگہ نفرا کم تبدیل شودہ، امو پروفائل شی دَ ٹایم لائن تبدیل شودہ۔ ما ام امی کار رَ کدوم و ٹایم لائن کی یگ نو نمونہ فیس بوک بود رَ نصب کدوم۔ اول خوب نموفامیدوم مگر آخر شی فامیدوم کی دمزی ٹایم لائن دَ آسانی کونہ (کہنہ) پوسٹ خو رَ پیدا میتنی و مینگرنی کی چیز بودہ ۔۔۔۔یگ دفعہ دَ خیال مہ اماد کی دَ فلانہ پوسٹ مہ او پیغام (کمنٹ) مزاقی نوشتہ کدہ بود کی ما دَ یاد مہ بود۔ فوراً پیدا کدوم و دیدوم کی شمامہ پیدا شود۔۔۔۔از خوشی نموفامیدوم چیکار کنوم۔ تیز رافتہ یگ پیغام کدوم کی خالئ ما امو بچہ استوم کی انیتر گب زدہ بودی۔ او مَرہ شناخت و گفت تا بالی طوی نکدے، ما خندہ کدوم گفتوم نہ قسمت نبود۔ نا گفتہ نمنہ کی دمزی روزا حالات کوئٹہ بسیار غدر خراب بود و ار طرف ھزارہ کشی دَ جریان بود، ار کس دَ ار سری دنیا دَ اخبار مینگرنید کی دَ کوئٹہ ای آل (حال) استہ۔ ایتر بد آلی بود کی از بس( اتوبوس) تا موکدن و دانہ دانہ توغ موکدن ار کس ازرہ یا شیعہ موبود رَ موکوشتن جای در جای۔

ما ام ازو پرسان کدوم کی تا بالی طوی نکدے، کی گوفت نہ، تو پیدا کو بلدے مہ یگ دانہ خوب پیسہ دار شوی، کی مَرہ خندہ گرفت، شمامہ یگ دختر چیم سفید و روی راست کی ار گبی دل خو موگوفت، ای رَ توغ نموکد کی ای آدم کی استہ کی گوش مونہ، خلاصہ ای یگ چیزی بود کی ما از گب زدو قد ازو فامیدوم، چیقز شی درست چیقز شی نا درست ، خود شی داند، خدای شی داند، مگر بسیار دانستہ و با فھم بود، اَر (ھر) گب رَ موفامید از مہ کدہ خوبتر و بہتر، باز گوفتوم کی ما تورہ پور موشت نکدوم و امیشہ دَ یاد مہ بودی، ایم دفعہ صاف صاف گوفتوم کی خوش دروم تو رہ و قد از مہ طوی کنو، کی بے از تو زندگی نموشہ۔۔۔۔ار چند خود مہ ایج نموفامیدوم چیز موگوم، آیا درست موگوم یا نا درست، تا چی حد رَ بلے ازی گب خو ایستہ موشوم یا کی صرف از خاطر کانادا و خارج استہ؟ خلاصہ دل رَ دَ دریا زدہ گفتہ مورافتوم، و او دخترنبود بلا بود، موگوفت کی تو ریزہ استے، نموشہ، مزاق نکو، ناممکن استہ، بیا کانادا ما تو رَ توغ کنوم۔۔۔۔۔۔۔۔۔۔۔

مگر ما کم کم یا کی دَ مزاق مزاق خود خو راضی کدہ بودوم ، ذھن خو تیار کدہ بودوم، کی قد امزی دختر طوی مونوم ۔ مگر ای گب رَ نہ خود مہ موفامیدوم نہ او ، کی چطور دَ عشقی ازو مبتلا شودہ بودوم، اول خو ما فکر نموکدوم کی ای راست شَوہ و ما آھستہ آھستہ فامیدوم کی نہ بابا ما راستی راستی عاشق شودوم۔
موگن غم ندرے بوز بیخر۔ ما چی موفامیدوم ای کارا خَو مَو مہ رہ برباد مونہ، او دَ دیگہ سری دنیا زندگی موکد، اینجی روز موشود اونجی شو، دہ سات (ساعت) فرق دشت۔ مجبور بودوم شَو بیدار بیشنوم تا صبا گا۔ یا کی صبا گا بال شووم ۔ نیماز بعد آن لائن شووم تا کی قد ازو گب بیزنوم۔۔۔دمزی دوران چند دفعہ قد از مہ جنگ کد کی ایلہ بیدی جان مہ رَ ، نہ تو کانادا امدہ میتنی نہ کی ما کوئٹہ، مگر ما ای گبا رَ نموفامیدوم ، ما صرف شمامہ دَ کار مہ بود، آلی دیگہ قد خود خو ،خدای خو وعدہ کدہ بودوم کی دیگہ کس رَ خوش نکنوم، نہ طرفی دیگہ کس توغ کنوم، نہ قد دیگہ کس طوی کنوم، مگر ای چیزا رَ شمامہ کَی موفامید، چند دفعہ قد مہ قار کد کی دیگہ پیغام رَیی نکو و مَرَ ایلہ بیدی، ما ۳ سال بعد دَ گیر مہ امدہ بود چطور ایلہ موکدوم، ایقیز کوشش کدوم کی آخر شی راضی شود کی گب بوگہ و کم کم او ام فکر موکد کی امی بچہ خوش درہ مہ رہ، ما گوفتوم کی مو ایتر کاروبار دشتی و پیسہ و دیگہ، خو دَ دل خو فکر کد کی ای بچہ شاید امدہ بیتنہ طرفی کانادا۔ امزی خاطر شمارہ ٹیلیفون مہ رَ گرفت و ٹیلیفون کد یگ شاو، خوب دَ یاد مہ استہ، موسومی یخی زمستو بود، ما ترس خوردوم کی اگر کس مَرَ گیر کنہ خو ، بد موشہ و پُرسان مونن کی استہ، قد کی گب موگی، ازی خاطر کی دَ خانہ از مو، ازی رواجا ایج نبود کی مو قد کس عشق و عاشقی کنی یا کی قد کس دَ ٹیلیفون نیسپی شَو گب بوگی۔

قصہ از مہ و دختری اَزرہ از کانادا

2014-08-06T12:00:00Z

بخش دوم: آشنایی قد شمامہ ھزارہ

ازرہ فرق نمونہ از کودم مذھب بشہ، شیعہ، سنی، اسماعیلی، مسیحی، کمونیسٹ یا ھر چیز کی بشہ، ازرہ استہ، ای رَ ما نموگوم دشمنای مو ، موگہ۔ امیتر ای دختر “ر” عرف شمامہ ام یگ دختر ی استہ کی آتے شی اسماعیلی بودہ البتہ کم گرایش خلقی ام دشتہ، آبے شی سنی مذھب استہ و آتہ محترم شی دَ دور طالبان شہید شدہ بودہ کی خدا تمام شہدا ء رَ رحمت کنہ کی تمام شی مظلوم بودن۔
آتے شمامہ یگ با سواد ، دانشگاہ (یونیورسٹی) خواندہ ، روشن فکر و سیاستدان انسان بودہ کی دَ دور طالبانی مُردار از خاطری ازرہ بودون خو دیستگیر موشہ و شہید ِ راہ وطن ھزارستان موشہ۔ از تمام کٹہ اولاد شی اینمی شمامہ بودہ کی ازو بعد چند دیگہ اولاد دشتہ کی 2 بچہ و 2 دختر دیگہ ام استہ۔ از شہادت آتے شی بعد دیگہ اوغانستان جای بلدے زندگی ازینا نبودہ، خانوادہ محترم شمامہ از اوغانستان کوج مونن و دَ راولپنڈی پاکستان امدہ زندگی مونن، کم کم دَ سازمان ملل مورن و برای پناھندگی عرض مونن۔ ازو بعد دَ کراچی ام زندگی مونن، خلاصہ ای دختر دَری، اردو، سندھی و انگلیسی رَ یاد درہ آلی کم یا زیاد شی خود شی داند۔۔۔۔قد از مہ خو پگ شی رَ موگوفت۔۔۔۔ازرگی شی ام شیرین بود کی ما کم موفامیدوم۔ ای دختر مجبور بودہ کم کم کار ام کنہ تا کی خرچ خانہ بور شَوَہ۔ بیرار شی ام کار موکدہ۔

خوب دَ یاد مہ نمندہ کی دَ کوجا ، کودم صفحہ، مگر دَ فیس بوک آشنا شودوم۔۔۔۔اول عکس شی دیدوم ، اوقز خوبشی نبود کی دل مہ بورہ، راس شی بوگوم چندانی خوش مہ نماد ، مگر بے کار بودوم بلدے گب زدو قد شی سلام دعا شروع کدوم۔ فامیدوم کی 4 سال از مہ کدہ کٹہ استہ و تا بالی طوی نکدہ، دَ کانادا زندگی مونہ قد تمام خانوادہ محترم۔قد شی مزاق کدوم گفتوم خالَی چطور استے، گفت مہ رَ خالی موگی ، گوفتوم کٹہ استے دیگہ۔

امیتر چند روز تیر شود، دَ دل مہ اماد کی اینمی دختر رَ قد شی گب دے، بوگی قد تو طوی کنہ برو کانادا، آیندہ خو جور کو۔ گوفتوم شیرہ کی انیتر۔ خندہ کد گفت تو ریزہ استے، و از خاطری کانادا قد خالَی طوی مونی، ما خندہ کدوم۔ دَ دل خو گوفتوم کی راست موگہ، مگر ما باید کی وفادار بشوم و قد شی بوگوم کی تو رَ ایلہ نمونوم تو رَ خوش دروم۔ امیتر گوفتوم۔ مگر او باز گفت کی دختر خوب بَلے انٹرنٹ طوی نمونہ۔ خو خلاصہ ما غَدر کوشش کدوم مگر او از مہ کدم ہوشیار بود۔

دمزی مینہ فیس بوک یگ برنامہ کارٹون جور کدو شروع کد کی دَ بارے پیغمبر اسلام بود کی ما غَدر قار شودوم۔ امزی خاطر فیس بوک رَ ایلہ کدوم ۔

ما فکر موکدوم کی شمامہ از ذھن مہ بور خواد شود۔ فیس بوک رَ خو ایلہ ددہ بودوم مگر شمامہ از یاد مہ نمورافت۔ کم کم فامیدوم کی نہ ، ای دختر دَ ذھن مہ استہ، ازی خاطر شاید کی ما قد دیگہ کس ایج گب شپ ندشتوم۔ امیتر دیگہ سایت ھا رَ جستجو کدوم کی شاید ای دختر رَ پیدا کنوم از جملہ ھزارہ نیٹورک از حبیب پیمان۔دَزی سایت زیاد مصروف شدوم از خاطری کی اینجی قد مذھب بد دشمنی رَ گرفتہ بودن وار چیز ِ بد رَ قد مذھب گڈ موکدن۔ مگر ما دمزی حالات ام او کسائی کی دَ آمریکا یا کانادا بودن رَ توغ موکدوم کی دوستی ازو بشہ یا کی خود شی بشہ، مگر ناکام مندوم و پیدا نکدوم۔ ار چند چندانی دَ فکر شی نبودوم مگر کم کم دَ ذھن مہ بود، آخر شی یگ سال تیر شود ، دو سال تیر شود تقریباً سہ سال تیر شود ما تا آلی ام دَ یاد شی بودوم ، دل رَ دَ دریا زدوم و دوبارہ فیس بوک رَ واز کدوم، مگر ای دختر نبود نہ کی اوتر پیغامای شیرہ پیدا کدوم کی دیگہ او حساب فیس بوک شی بند بود۔ ما خبر نبودوم کی او دو (۲) دانہ فیس بوک اکاؤنٹ دشتہ بودہ، مگر نا اُمید نبودوم، دَ دل خو موگوفتوم کی شاید دوبارہ پیدا کنوم ۔

قصہ از مہ و دختری اَزرہ از کانادا

2014-07-22T20:56:54Z

Sommaire

بخش اول: آشنایی قد صلصال علی ھزارہ

بخش اول: آشنایی قد صلصال علی ھزارہ

ما “ن” عرف صلصال علی ھزارہ استوم و دَ کوئٹہ زندگی مونوم ، آتے مہ و رشتہ دارای مو تقریباً تمام دَ وقتی کی ریزہ بودوم از کوئٹہ طرفی ایران مورہ و امونجی زندگی رَ شروع مونہ، ما امونجی دَ سنی بلوغیت میرسوم و مکتب میخوانوم، ای نا گفتہ نمنہ کی آتے مہ دَ ایران زیاد تیر کدہ بود و شناسنامہ ایرانی ام دَشت مگر از خاطری ازی کی می دید کی قد دیگہ اَزرہ کی مھاجر بودن رفتار اجتماعی خوبی نموشود، خود شی شناسنامہ خو دَر میدہ و دَ صورت یگ مھاجر زندگی تیر مونہ تا کی بلے دیگہ قومای خو فخر نکنہ، ای از جذبے پاکی قوم دوستی شی بود، امیتر آتے مہ دَ امام حسین و محرم زیاد عقیدہ دَرہ کی تا بالی استہ و اثرات شی دَ پورا خانوادہ مو استہ، یعنی شکری خدا تمام مو مذھبی استے مگر دَ نامی مذھب یا قوم بازی خوردو رَ ام یاد ندرے۔

خلاصہ اثراتی آتے محترم مہ دَز مہ ام امدہ بود و ما دَ یگ وقت یگ آدمی مذھبی و قوم دوست بودوم ، امزی خاطر شعو ر مذھبی و قومی دشتوم از ریزگگی، انمیتر دَ ذھن مہ امیشہ (ھمیشہ) یگ سوال میماد کی مردم اَزرہ از کجا امدہ و اصل و نصب شی چی استہ، دَزی رابطہ ام کم مطالعہ دَشتوم، ای تمام چیزا شاید باعث شود کی ما یگ آدمی متفاوت از دیگا باشوم و دَ آسانی بازی نخروم، بَلے کو افتخار موکدوم ، اصلیت ملا و قوم پرستی ار(ھر) دوی شی رَ میدیدوم و خبر بودوم تا چی حد رَ مورہ، مگر زوری کی ملا دشت و دَ نامی مذھب غیر قوم بَلے مو حکومت موکد ومو یگ مُلک ھم ندشتی ای دو چیز بسیار رنج می دد۔

مردم ایران بعد از انقلاب بسیار تبدیل شدہ بودن ، اعتماد بہ نفس پیدا کدہ بودن و تقریباً اَزرہ (افغانی) رَ قدری سگ ام حساب نموکدن، البتہ ای رجحان قد مذھبیای ایرانیا زیادتر بود و اونا خلاف تعلیمات مذھب، اَزرہ رَ غَدر اذیت موکدن، ای چیزایی بود کی ما قد چیشیم خو میدیدوم و شاہد بودوم، یعنی اونا شیعہ فقط برای نام بودن، عمل شی بالکل مختلف بود۔

مردمی ازرہ ام کی گبی ایرانی رَ دَ خوبی یاد میگرفتن و دیگہ ازرگی نموگوفتن مگر آتے از مہ ،مو رَ یاد ددہ بود کی ازرگی گفتو باعث فخر استہ، امزی خاطر مو دَ خانہ ازرگی موگوفتی، آخر شی دَ یگ زمان ایران دشمن ازرہ و بابہ مزاری جور شود بطوری کی دیگہ سازمان اطلاعات شی اجازت نمی دد کی دیگہ کس عکس بابہ مزاری رَ دَ یگو مجلس بیزنہ و مزدور ام زیاد دَشت، اعم از ازرہ و سید۔ دَزی حال آتے ازمہ کی از شخصیت ھای برجستہ سیاسی دَ شار(شہر) بود قد اطلاعات چپ خورد، و خلاصہ آخر شی مجبور شُدی کی از ایران دوتا کَنی و واپس دَ کوئٹہ آباد شَوی۔

دَ سالی 1997 مارچ مو واپس کوئٹہ امادی، ناگفتہ نمنہ کی دَ کوئٹہ مو ایج خویش یا رشتہ دار نداشتی یعنی رافت و آمد خانگی نبود قد کس ، اینجی ازرہ رَ دَ قدرت دیدی غَدر خوش شودی، مزہ موکد کی قوم موٹر درہ، قوم دَ حکومت استہ، قوم مکتب درہ، شفاخانہ درہ و غیرہ۔ مگر بر عکس انتظار مو مردم ازرہ کوئٹہ متاسفانہ بسیار بد اخلاق، بد زبان و قد دیگہ ازرہ بسیار بد رویہ موکدن ، او قمبختو رَ لالئ (بے عقل)، ٹَیر سول(نادان)لقب میددن، تقریباً قد ایرانی فرق ندشتن، البتہ مو تجربے ایرانیا رَ دشتی و فامیدی کی باید زبان خو، ازی مردم ووری شور بیدی و تورہ بوگی وَ کوئٹگی جور شَوی ۔ اینجی فرق نموکد اینجی ازرہ بود۔ اگر مو، ازینا ووری گب موگوفتی ام ایج گب نبود ۔ ازرہ خو بود۔ خلاصہ کم کم مو مکتب رافتی، و تقریباً قد ھر چیز کوئٹہ آشنا شودی، مو حالات مالی مو خوب بود از ایران پیسہ اووردہ بودی و خانہ خریدہ بودی، کار و بار رَ دَ مارکٹ شروع کدہ بودی، مگر آتے خو رَ مشورہ دَدی کی دیگہ دَ سیاست کار نگرہ تا کی مو از کوئٹہ ام دوتا کدنی نشوی۔ مگر دَ معاملہ کار و بار چندانی قمست ندشتی، ار کار موکدی او ،سر نمیگرفت مگر بازام پیسہ بود و کار میچلید تا کی ما امیتر کالج خواندوم ۔ دمزی دوران بلے سردار سعادت علی ھزارہ حملہ شد دَ سالی 1999 و ازو بعد یگ قسم ھزارہ کشی دَ شار کوئٹہ شروع شد۔ متاسفانہ ای حالات بسیار بدتر شد۔ ما از شار بیزار شدہ بودوم و فکر موکدوم کی آسٹریلیا بوروم یا ۔یگو۔ رقم از پاکستان بور شووم، مگر دَ اقتصاد غدر کمزور شدہ بودی امز و خاطر دیگہ شور خوردہ نمیتنستوم۔

کم کم دَ ذھن مہ ای گب میماد کی یگو دختر پیدا کنوم از خارج کی بوروم و خانوادہ رَ ازو بعد بوبروم، مگر مو خو ایج قوما یا خویش دَ خارج ندشتی ، یگ بیرار ِ کَٹے مہ خو کی دَ آسٹریلیا بود سر رَ دَ بے ننگی زدہ بود ، دَ غمی ازمو نبود۔ دمزی حالات بدی کوئٹہ کی ما دیگہ کم کم کوئٹگی شدہ بودوم و اردو، انگلیسی ، کمپوتر مہ از دیگا کم نبود، و َ دَ ار کاری حکومت خوب موفامیدوم، ار چند قد کس تا بالی رافت و آمد ندشتی۔ مگر ماحول اجتماعی ھزارہ ھای کوئٹہ خوب بود، آدم خوب خواندہ می تنیست یا کی اگر پیسہ میدشت مورافت طرفی کراچی، لاہور خوب باسواد موشود۔ مگر صد افسوس کی از دست طالبان، لشکر جھنگوی وغیرہ دیگہ اَزرہ دَ کوئٹہ زندگی نمی تنیست، ار روز یگ اَزرہ شہید موشود ، دمزی حالات ما دَ سایت فیس بوک یگ روز قد یگ دختر اَزرہ از کانادا آشنا شودوم۔۔۔
قسمت اول خلاص شود۔