داحمدولي شهادت اوپه پښتنو کې د مشرتوب ستونزه

په دې وروستیوکې خدای بښلی احمدولي کرزی د کندهار دولایتي شورا مشر ،د افغانستان اولس مشر ښاغلی حامد کرزي کشر ورور او په پښتنو کې پیژندل شوي څيره په ډیره بې رحمانه توګه په خپل کور کې په شهادت ورسید.

دده شهادت نه یوازې افغانستان بلکې ټولو پښتنو ته ټکان ورکړ.
دا یوازې خدای بښلی احمدولي کرزی نه دی بلکې استاد بهاوالدین مجروح ، عبد الاحد کرزی ، استاد حکیم تڼیوال د پکتیا والی ، ملک زرین ، د کندز والي محمدعمر، عبد المجید بابي ، اکرم خاکریزوال او نور په لس ګونو کسان د نامعلوم کړیو له خوا په شهادت رسول شوي دي.
په همدې ډول د کابل د ادارې په مشر ښاغلي حامد کرزی ، ګل اغا شیرزي ، افتاب احمد شیرپاو، افضل خان لا له ... باندې وژونکي بریدونه شوي دی چې تر دې دمه لوی څښتن ساتلي دي.

د نامعلومو پښتنو ضد کړیو له خوا د پښتنو د مشرانو وژلو دا اولس د یو شمیر ستونزو سره مخامخ کړی دی. او دا ددې سبب شوي دي چې په پښتنو کې د یوه مرکزي مشرتوب د رامنځته کیدو په لازه کې یو شمیر خنډونه راپیدا کړي.
زیات شمیر کتونکي په دې باور دي چې یو د هغو عواملو څخه چې پښتانه د اوسنیو ستونزو څخه دځانو په ژغورلو او د خپلو غلیمانو د توطیو په شنډولو کې پاتې راغلي دي په پښتنو کې د مرکزي مشرتوب نشتوالی دی . تر څو ټول پښتانه د یوه متحد اولس په توګه خپلې ملي ګټې خوندي کړې.

دپښتنو په وړاندې جګړه مختلف اړخونه لري :
اوس مهال طالبانو ، بهرنیانو ، تهران ، د کابل ادارې او د پاکستان د حکومت له خوا د پښتنو د سیمې د جګړو په ډګر اړولي چې موخه یې د پښتنو ټول وژنه او ددې اولس کمزوري کول دي.

دویم اړخ د پښتنو په وړاندې اقتصادي جګړه ده ددې جګړې څخه موخه په پښتني سیمو کې د اقتصادي فعالیتونو ودرول او ددې سیمو خلک د اقتصادي پرمختګ څخه بې برخې کول دی.
ددې جګړې دریم اړخ په پښتني سیمو کې د علم او معارف مخنیوی دی پورتنې یاد شوي پښتون دښمنه ځواکونه زیار باسی چې پښتانه د زده کړې او پوهې څخه بې برخې کړي. دوی دلته ښوونځی سوځوی او په مختلفو لا رو سره د لوړو زده کړو موسسو ته د پښتنو زده کونکو مخنیوی کوی.
ددې جګړې څلرم اړخ د پښتنو مشرانو په مختلفو سویو سره وژل دي چې ددې وژلو څخه د پښتنو د مشرتوب او یووالی څخه بې برخې کول دي.

د پښتنو د مشرانو وژل په افغانستان کې خدای بښلي محمد داود د حکومت په را نسکوریدو سره پیل شول. نوي حکومت په مختلفو نومونو سره د پښتنو زیات شمیر مشران ، روڼ اندي او سیاسي څیرې د زندان تورو کوټو ته واچول او یا یې په ډیره بې رحمۍ سره ووژل.

همدارنګه د کابل د ادارې په وړاندې د جګړې په بهیر کې پاکستانی منابعو هڅه کوله چې په پښتنو کې ټول هغه کسان او په ځانګړي توګه هغو مشرانو چې د ملي تفکر خاوندان او د پرمختګ غوښتونکي و ، له منځه یووسي تر څو په پښتني ټولنه کې د ملي مشرتوب بنسټ له منځه یووسی او په ځای یې هغه توند لاري ډلې چې د پاکستاني پټو سرویسونو تر اغیزې لاندې و حاکم کړي .
د پښتنو په هره سیمه کې د پښتنو مشران د یوې ټاکلي موخې د پاره وژل کیږي.چې د هغې سیمې په حالاتو کې اغیزه لري خو بیا د هغې ترڅنګ ددې وژنو څخه یوه عمومی موخه داده چې پښتون اولس د مشرتوب څخه بې برخې کړی تر څو د پښتون دښمنه ځواکونو د ناوړو پلانونو د تطبیق له پاره لاره هواره شي.
ددې په اړخ کې د پښتنو د مشرانو د وژلو څخه د ځینو ځانګړو سیمه ایزو موخو تر لاسه کول هم دي. د ساري په ډول د لوی کندهار او هرات په سیمو د پښتنو د مشرانو د وژلو موخه داده چې دا سیمه له تاریخي پلوه د بخدي او غور څخه د پښتنو د غورځنګونو او د نویو حکومتونو د رامنځته کیدو سیمې دی ددې سیمو پښتنو د خپلو مبارزاتو په ترځ کې ځواکمن حکومتونه رامنځته کړي دی .

غوریان ، هوتکیان ، ابدالیان او نور ددې سیمو څخه راپاڅیدلي او لوی او ځواکمن حکومتونه یې جوړ کړی دي. ددې سیمو مشران په دې توانیدلي دي چې د ټولو پښتنو تر منځ یووالی تامین کړي.
له دې امله ایرانی اوپاکستانی پټو سرویسونو د افغانستان د پښتون دښمنه کړیو په مرسته په کندهار او هرات کې د پښتنو د مشرانو وژلو ته مخه کړي ده . په دې کې هیڅ شک نه شته چې ایراني او پاکستاني پټ منابع په دې لټه کې دي چې په ګډه د پښتون اولس په کمزوري کولو کې برخه واخلي.

اوس مهال د پښتنو د سټولو په اړخ کې د پښتنو د مشرانو وژل تر پخوا ډير بربنډ او ښکاره دي یوازې د کندهار په ولایت کې د شپږ سوو په شاوخوا کې پښتانه مشران وژل شوي دي.
که څه هم د کابل ادارې مشر ښاغلی حامد کرزي پښتنو ددې مشرانو وژل محکوم کړي دي خو تر اوسه یې دا ټکې نه دې جوت کړی چې د پښتنو د مشرانو وژل په افغانستان کې د چا له خوا په مخ بیول کیږي .

یو شمیر کتونکي په دې باور دې چې د افغانستان په شمال او د کندهار اوهرات په حوزو کې د پښتنو د مشرانو وژلو کې د کابل په اداره کې یو شمیر کړۍ هم لاس لري چې د ایران او پاکستاني سرچینو په همکاری سره دا جنایتکارانه بهیر مخې ته بیايي .خو تر اوسه په دې هکله اسناد د خلکو لاسته نه دی ورغلی .
همدارنګه په قبایلی سیموکې هم د پښتنو د مشرانو وژل روان دي .د ځینو راپورونو سره سم په دې سیمو کې اوو سوو څخه ډير پښتانه مشران د پاکستان د پټو سرچینو له خوا په بې رحمانه توګه شهیدان کړل شوي دي.

ددې مشرانو د وژلو څخه د پاکستان استخبارات درې موخې لري لومړی داچې د ترهرګرو ډلو په وړاندې ددې سیمو د مشرانو مقاومت له منځه یووسی او په دې ډول د پاکستان استخباراتي ارګانونه وکولای شي په پښتني سیمو کې ترهګرې ډلې د نړیوالې ټولنې او په خپله دې ځايي سیمو خلکو په ضد ځای په ځای کړي . تر څو دا خلک د پنجابې استعمار په وړاندې سره یو نه شی. او هم په عمومي توګه د پښتنو د کمزوري کیدو سبب شي.
د افغانستان په شمال کې د پښتنو مشرانو وژل روان دي. تر اوسه د افغانستان په شمال کې په سل ګونو د پښتنو مشران وژل شوي دي . د شمال پښتنو په څو څو ځله د مرکزي دولت او په ځانګړی توګه د کابل د ادارې د مشر ښاغلي حامد کرزي غوښتي دي چې په شمال کې د پښتنو وژلو بهیر چې د پيژندل شوو کړیو له خوا تر سره کیږي ودروي .
خو تر اوسه دا بهیر روان دي په شمال کې د پښتنو مشرانو د وژلو څخه موخه په شمال کې د پښتنو کمزوري کول او د افغانستان څخه ددې برخې بیلول دی.

دبلې خوا پښتون دښمنه ځواکونه په دې لټه کې چې دپښتنو په مینځ کې یو مصنوعي او د پنجاب او په کابل کې د متعصبو پاشیستي کړیو مزدور مشرتوب رامنځته کړي.
ددې موخې له پاره پاکستان په پښتني سیمو کې حکومتي ملکان رامنځته کړي او د هغه هیواد د پټو سرچینو څخه په منظم ډول معاشونه خوري. دا ملکان چې د قومي مشرانو خطاب ورته کیږي د پاکستانی استخباراتو د مامورینو په توګه دندې تر سره کوي. دا ملکان پښتنو د سیمو د وروسته پاتې کیدو او پښتنو یووالی په لازه کې عمده خنډونه دی.

په افغانستان کې په تیرو دوو کلونو کې متعصبو پاشیستي د پښتنو ضد کړیو دا هڅه کړي ده چې د پښتنو په مینځ کې د خپلو مزدورانو یو جال وغوړوي او تر ډیرې اندازې په دې کې بریالي شوي هم دي

اوس په پښتنو کې داسې کسان شته چې په ډيره بې شرمۍ سره د پښتنو ضد متعصبو پاشیستي ډلو څخه په ښکاره دفاع کوي او د هغوی ناوړو موخو له پاره کار کوي.

مشرتوب په یوه ټولنه کې یو اړین اصل دی ټولنه دخپل خوځښت او پرمختګ په لاره کې د اړتیا له مخې خپل مشران رامنځته کوي. دا په دې مانا چې دمشرانو په وژلو او یا رانیولو سره په یوه ټولنه کې د مشرتوب بنسټ نه له منځه ځي.
نو که هر څومره په کابل کې پاشیستي متعصبې ډلې ، ایران او پاکستان هڅه وکړي چې د پښتنو مشران له منځه یووسي بیا هم په دې موخه نشي بریالي کیدای. دا ځکه چې دا مشرتوب د ټولیزو اړتیاو له امله رامنځته کیږي.
په پښتنوکې اوس هم په زرګونو داسې مشران شته دي چې په ډير صداقت او وړتیا سره ددې مظلوم ، محکوم او ځوریدلي اولس د پاره کار کوي . دوی په دې لاره کې هر ډول ستونزو د زغملو او دسرښندنو په ورکولو سره تیار دي تر څو دې قوم ته لازم چوپړ وکړي.

اوس دا پوښتنه پیدا کیږي چې څرنګه کیدای شي اغیزمن پښتون مشرتوب را منځته شي؟

پښتون اولس دا حق لري چې د یوه ملت په توګه د سیمې او نورې نړۍ د ملتونو په شان دټولو حقوقو څخه برخمن شي.
دا حق دوی ته هیڅوک نه ورکوي بلکې دا حق باید د خپلو مټو په زور سره تر لاسه کړي.ۍپښتانه د ځانه د روا دفاع حق لري او ددې حق د تامین له پاره باید پښتانه وړ میکانیزم رامنځته کړي . تر څو دوی په لومړي پړاو کې د خپلو پيژندل شوو شخصیتونو څخه دفاع وکړي.

په ژړاو او غندلو سره کوم کار نه کیږي باید غلیم ته ورته ځواب ورکړل شي.
پښتون مشرتوب یوه اړتیا ده دا ځکه چې د کراچۍ څخه نیولي تر بادغیس او د درقد څخه نیولي تر کشمیره پورې ټول پښتون قوم ټوټې پروت او په خپله سیمه کې د خپل برخلیک د ټاکلو واک نه لري.پښتون اولس په یاده سیمه کې د محکوم اولس په توګه ژوند کوي.
پښتون ضد ځواکونه په دې بسوالی نه کوي بلکې ددې قوم د بشپړ له منځه تلو په فکر کې دي او ددې موخې له پاره یو شمیر پلانونه یې تر لاس لاندې نیولي دي.

اوس ټول پښتانه د بیا یو کیدو په اړتیا پوه شوي دی او وایی ( یا به یو کیږو او ګني ورکیږو) . پښتنو د بابا خان عبدالغفارخان ددې وصیت د عملي کولو د پاره لازمه ده چې یو شمیر عملي ګامونه پورته شي.
پنجاب او ایران غواړی د مسلمانانو د یووالی په نوم پښتون اولس تیرباسی او ددې پردې لاندې په پښتنو باندې خپل حاکمیت ټینګ وساتي .

د ډاکټر نجیب الله د ادارې د نسکوریدو څخه څو میاشتې مخکې د پاشیستي متعصبو ډلو له خوا په افغانستان کې د اقلیتونو د حاکمیت مفکوره په رسمي ډول د ځينو متعصبو ډلو له خوا رامنځته شوه .

چې ورسره جوخت د دوی د غوښتنې سره سم اداره په کابل کې رامنځته شوه .

د طالبانو په نسکوریدو سره سم پورتنی ډلې د امریکا د سرتیرو او الوتکو په مرسته ددې ډلو واکمني د دوهم ځل له پاره رامنځته شوه دې ادارې ته د بن د کنفرانس په پریکړو کې رسمیت ورکړل شو . او س عمل اکثریت ( پښتون اولس ) محکوم او د اقلیت په نوم پاشیستي متعصبې ډلې حاکمې دي.
ددې له پاره چې پښتانه د نړی د نورو ازادو اولسونو په شان د بشپړو حقوقو خاوندان شي دوی ته په لومړي پړاو کې ملي یووالی ته اړتیا لیدل کیږي.

اوس پښتانه مشران په دې پوه شوي دي چې دوی باید یووالی لومړی د خپلو کلیو، ولسوالیو او ولایتونه څخه پیل او د هیواد تر سطحې پورې یې ورسوي او وروسته دې یووالي ته د سیمې په سطحه کار وشي.

ددې له پاره چې پښتانه د یوه ځواک په توګه په سیمه کې را څرګند شی اړینه ده چې پښتانه هر چیرې چې وي د یو د بل د روا حقوقو څخه په جوته او په میړانه دفاع وکړي.
د ساري په توګه ټولو پښتنو ته اړه وه او ده چې دوی د مظلومو کوچیانو د روا حقوقو څخه د دفاع غږ پورته کړي

یا د هیواد په شمال ولایتونو کې د زورواکو ډلو له خوا د بې ځایه شوو پښتنو د بیرته ځای په ځای کولو د پاره په ګډه لاس په کار شي

او یا دکراچۍ په ښار کې د پنجاب د پټو سرچینو له خوا د پښتنو وژل ، باید د ټولو پښتنو له خوا وغندل شي.
پښتون اولس د خپلو مشرانو ډیر درناوی کوي او تل یې نومونه ژوندي ساتي.
ښکاره ده چې د پښتنو کلیوالي ، ولسوالی ، ولایتي مشرتوبونه باید په ملي مشرتوب واوړي دا په دې مانا چې د ټولو پښتنو یو مرکزي مشرتوب رامنځته شي تر څو په سیمه کې ټول پښتانه د بادغیس څخه تر کراچۍ پورې د هغوی د لارښوونو سره سم عمل وکړي او د یوه ځواک په توګه د نورو قومونو او ملیتونو سره د ورورۍ په فضا کې ژوند وکړي.

هغه مهال به د پښتنو د ټولو سیمو څخه جوړ شوی ځواکمن هیواد رامنځته شي چې ټول قومونه او ملیتونه به په کې د برابرو حقوقو لرونکي وي .